హైద్రాబాద్, డిసెంబర్ 18 (way2newstv.com)
గత నవంబరు 13న అర్ధరాత్రి ఔటర్‌ రింగ్‌రోడ్డుపై నటుడు రాజశేఖర్ కారు బోల్తా పడిన విషయం తెలిసిందే. రామోజీ ఫిల్మ్ సిటీలో షూటింగ్ ముగించుకుని వస్తున్న ఆయన వాహనం శంషాబాద్‌ దగ్గరలోని పెద్ద గోల్కండ వద్ద అదుపుతప్పి పడింది. ప్రమాద సమయంలో రాజశేఖర్ స్వయంగా వాహనం నడిపారు. ఈ ఘటనపై కేసు నమోదుచేసిన పోలీసులు.. దర్యాప్తు చేపట్టారు. ఈ నేపథ్యంలో పలు ఆసక్తిక విషయాలు వెలుగులోకి వచ్చాయి. అసలు ఆయన లైసెన్స్ లేకుండానే వాహనం నడిపినట్టు దర్యాప్తులో తేలింది.రాజశేఖర్ తన లైసెన్స్‌ను 2012 జూన్‌ 18న రెన్యువల్ చేయించుకోగా దాని కాలపరిమితి 2017 జూన్‌ 17తో ముగిసింది. ఆ తర్వాత లైసెన్స్‌ను ఆయన పునరుద్ధరించుకోలేదు.
లైసెన్స్ లేకుండానే రాజశేఖర్ డ్రైవింగ్
నవంబరు 13న రాజశేఖర్ నడుపుతున్న కారు ప్రమాదానికి గురికాగా, ఆయన మరో వాహనంలో ఇంటికి వెళ్లిపోయారు. ప్రమాద ఘటనపై శంషాబాద్‌ పోలీసులు కేసు నమోదు చేశారు. నిర్లక్ష్యంగా వాహనం నడిపి ప్రమాదం చేసినందుకు రాజశేఖర్ లైసెన్స్ తాత్కాలికంగా రద్దు చేయాలని ఆర్టీఏ అధికారులకు పోలీసులు లేఖ రాశారు.టోలీచౌకి ఆర్టీఏ అధికారులు ఆరు నెలల పాటు లైసెన్స్‌ను రద్దుచేస్తూ ఉత్తర్వులు జారీచేశారు. నవంబరు 29 నుంచి 2020 మే 28 వరకు లైసెన్స్ రద్దు అమల్లో ఉంటుందని పేర్కొన్నారు. ఈ క్రమంలోనే రాజశేఖర్ డ్రైవింగ్ లైసెన్స్ గురించి ఆరా తీయగా అది కాలపరిమితి ముగిసినట్టు గుర్తించారు. దీంతో లైసెన్స్ లేకుండా వాహనం నడిపినందుకు మోటారు వాహనాల చట్టం 181 సెక్షన్‌ను జతచేయాలని పోలీసులు తాజాగా నిర్ణయించారు. అంతేకాదు, రాజశేఖర్ నడిపిన కారు ఏడాది కాలంలోనే 21సార్లు ట్రాఫిక్‌ ఉల్లంఘించినట్టు తేలింది. మొత్తం 21 చలానాల్లో 19 అతివేగానికి సంబంధించినే. ఆయన లైసెన్స్‌ను తాత్కాలికంగా రద్దుచేయడంతో ఇప్పటికిప్పుడు పునరుద్ధరించుకునే అవకాశం లేకపోయింది. వచ్చే మే 28 వరకు ఆగాల్సిందే. అప్పటి వరకు రాజశేఖర్ వాహనం నడిపితే చట్టపరంగా శిక్ష తప్పదని పోలీసులు స్పష్టం చేశారు. నవంబరు 13న జరిగిన ప్రమాదంలో రాజశేఖర్‌తో పాటు మరొకరికి గాయాలయ్యాయి. టీఎస్‌ 07 ఎఫ్‌జెడ్‌ 1234 నెంబరు కలిగిన కారు ప్రమాదంలో నుజ్జు నుజ్జుయ్యింది.
