84 దేశాలు, రూ.1,484 కోట్ల ఖర్చు - Way2News TV - Breaking News, Latest News, Politics News, Business News

Hot

84 దేశాలు, రూ.1,484 కోట్ల ఖర్చు

న్యూఢిల్లీ, జూలై  21 (way2newstv.com)
ప్రధానిగా బాధ్యతలు చేపట్టిన నాటి నుంచి ఇప్పటి వరకు నరేంద్ర మోదీ 84 దేశాలలో పర్యటించారని, ఆయన పర్యటనలకు మొత్తం రూ.1,484 కోట్లు ఖర్చయ్యిందని రాజ్యసభకు కేంద్రం తెలిపింది. దీనికి సంబంధించిన వివరాలను కేంద్ర విదేశాంగ శాఖ సహాయ మంత్రి వీకే సింగ్ గురువారం సభ ముందుంచారు. ఇందులో రూ.1,088.42 కోట్లు ప్రధాని ప్రయాణించే విమానాల నిర్వహణకు, రూ.387.16 కోట్లు అద్దె విమానాలకు, హాట్‌లైన్ కోసం రూ.9.12 కోట్లు ఖర్చయినట్టు ఆయన తెలిపారు. 2014 జూన్ 15 నుంచి 2018 జూన్ 10 వరకు మోదీ నాలుగేళ్లలో 84 దేశాల్లో పర్యటించారు. ఇప్పటి వరకు 42 సార్లు విదేశీ పర్యటనలకు వెళ్లిన మోదీ, 84 దేశాలను చుట్టివచ్చారు. మోదీ విదేశీ పర్యటన వివరాలను తెలియజేసిన కేంద్ర మంత్రి వీకే సింగ్, 2017- 18, 2018-19 సంవత్సరాలకు గానూ హాట్‌లైన్ ఖర్చుల మాత్రం వెల్లడించలేదు. అలాగే 2018-19 సంవత్సరానికి అద్దె విమానాలకు చేసిన ఖర్చును కూడా తెలియజేయలేదు. వీకే సింగ్ తెలిపిన వివరాల ప్రకారం 2015-16లో 24 దేశాలు, 2016- 17 ఏడాదిలో 18 దేశాలు, 2017- 18లో 19 దేశాల్లో మోదీ పర్యటించారు. ఇక 2014- 15లో భూటన్ పర్యటనతో తొలి విదేశీయానం చేసిన మోదీ ఆ ఏడాది 13 దేశాల్లో పర్యటించారు. 2018లో ఇప్పటి వరకు 10 దేశాల్లో పర్యటించారు. 2014- 15లో చార్టెడ్ విమానాలకు రూ.93.76 కోట్లు వెచ్చించగా, 2015-16లో ఈ మొత్తం రూ.117 కోట్లు. అలాగే 2016-17లో రూ.76.27 కోట్లు, 2017-18లో 99.32 కోట్లు ఖర్చుచేసినట్టు తెలిపారు. గతంలో ఏ భారత ప్రధాని పర్యటించని దేశాల్లో సైతం మోదీ అడుగుపెట్టారు. 



84 దేశాలు, రూ.1,484 కోట్ల ఖర్చు