న్యూఢిల్లీ, అక్టోబరు 15 (way2newstv.com)
వరల్డ్ ఛాంపియన్‌షిప్‌లో విజేతగా నిలిచిన తర్వాత భారీ అంచనాల నడుమ డెన్మార్క్ ఓపెన్‌లో అడుగుపెట్టిన భారత స్టార్ షట్లర్ పీవీ సింధు.. తొలి మ్యాచ్‌లోనే ఘన విజయాన్ని అందుకుంది. ఒడెన్స్ వేదికగా జరుగుతున్న ఈ టోర్నీలో ఇండోనేసియాకి చెందిన గ్రెగొరియా మరిస్కాతో మంగళవారం మహిళల సింగిల్స్ తొలి రౌండ్‌లో ఢీకొట్టిన పీవీ సింధు 22-20, 21-18 తేడాతో అలవోకగా గెలిచి రెండో రౌండ్‌లోకి ప్రవేశించింది.ఈ మ్యాచ్ ముందు వరకూ మరిస్కాపై 4-0తో గెలుపు రికార్డ్‌లో ఉన్న పీవీ సింధు.. మ్యాచ్ ఆరంభం నుంచే తన ఆధిపత్యాన్ని చెలాయించింది.
డెన్మార్క్ ఓపెన్ లో సింధూ విజయం
అయితే.. ఆరంభంలో కాస్త తడబడిన మరిస్కా.. మధ్యలో పుంజుకుంది. కానీ.. అప్పటికే జోరందుకున్న పీవీ సింధు 22-20 తేడాతో తొలి సెట్‌ని చేజిక్కించుకుంది. ఇక రెండో సెట్‌లో కూడా సింధూకి మరిస్కా పోటీనిచ్చినా మ్యాచ్‌ని మాత్రం గెలవలేకపోయింది. దీంతో.. తాజా విజయంతో మరిస్కాపై గెలుపు రికార్డ్‌ని 5-0తో సింధు మెరుగుపర్చుకుంది.పురుషుల సింగిల్స్‌లో భారత సీనియర్ షట్లర్ పారుపల్లి కశ్యప్ రెండో రౌండ్‌లోకి ప్రవేశించాడు. థాయ్‌లాండ్‌కి చెందిన థామ్సిన్‌పై 21-13, 21-12 తేడాతో వరుస సెట్లలో అతను విజయాన్ని అందుకున్నాడు. పీవీ సింధు 38 నిమిషాల్లో మ్యాచ్‌ని ముగించగా.. కశ్యప్ కూడా సరిగ్గా 38 నిమిషాల సమయమే తీసుకోవడం విశేషం.
