హైద్రాబాద్, ఫిబ్రవరి 23 (way2newstv.com)
టాలీవుడ్ లెజెండరీ దర్శకుడు, శతాధిక దర్శకుడు కోడి రామకృష్ణ భౌతికకాయానికి అంత్యక్రియలు ముగిశాయి. కుటుంబ సభ్యులు, అభిమానులు అశ్రునయనాల మధ్య హైదరాబాద్‌లోని జూబ్లీహిల్స్‌ మహాప్రస్థానంలో అంత్యక్రియలు నిర్వహించారు. కోడి రామకృష్ణ కూతురు దివ్య దీప్తి అంతిమ సంస్కారాలను నిర్వహించి.. చితికి నిప్పుపెట్టారు. కోడి రామకృష్ణ కడసారి చూసేందుకు ఆయన అభిమానులు భారీగా తరలివచ్చారు. ఇండస్ట్రీకి చెందిన ప్రముఖులు అంతిమయాత్రలో పాల్గొన్నారు. సురేష్ బాబు, క్రిష్ణంరాజు, కోట శ్రీనివాసరావు, వివి వినాయక్, పూరీ జగన్నాథ్ తదితరులు హాజరయ్యారు.
కోడి రామకృష్ణకు కూతురితో అంత్యక్రియలు
మధ్యాహ్నం 12 గంటల నుంచి ఒంటిగంట వరకు అభిమానుల సందర్శనార్ధం ఆయన భౌతికకాయాన్ని ఫిల్మ్‌చాంబర్‌లో ఉంచారు. మధ్యాహ్నం ఒంటి గంట తర్వాత జూబ్లీహిల్స్‌ మహాప్రస్థానంలో ఆయన అంత్యక్రియలు నిర్వహించారు. గత కొంత కాలంగా ఊపిరితిత్తుల వ్యాధితో బాధపడిన కోడి రామకృష్ణ గురువారం తీవ్ర అస్వస్థతకు గురికావడంతో కుటుంబ సభ్యులు వెంటనే గచ్చిబౌలిలోని ఏఐజి ఆసుపత్రికి తరలించారు. ఆయన ఆరోగ్య పరిస్థితి విషమించడంతో వైద్యులు వెంటిలేటర్‌పై ఉంచి చికిత్స అందించారు. అయితే, ఆయన ఆరోగ్యం మరింత క్షీణించి శుక్రవారం మధ్యాహ్నం తుదిశ్వాస విడిచారు. ఆయన వయసు 69 సంవత్సరాలు. ‘అమ్మోరు’, ‘దేవి’, ‘దేవీపుత్రుడు’, ‘అంజి’, ‘అరుంధతి’ వంటి ఫాంటసీ చిత్రాలతో తెలుగు సినిమా స్థాయిని ఒక మెట్టు ఎక్కించారు. తెలుగు, తమిళ, మలయాళం, కన్నడ, హిందీ భాషల్లో సుమారు 120 చిత్రాలకు దర్శకత్వం వహించారాయన. అక్కినేని నాగేశ్వరరావు, బాలక్రిష్ణ, చిరంజీవి, వెంకటేష్, నాగార్జున, రాజశేఖర్, వినోద్ కుమార్, భాను చందర్, అర్జున్, వడ్డే నవీన్, రాజేంద్ర ప్రసాద్, జగపతిబాబులతో పలు విజయవంతమైన చిత్రాలను రూపొందించారు కోడి రామకృష్ణ.
