బ్యాంకుల ఎఫెక్ట్,,,

నష్టాల్లో సూచీలు

ముంబై, అక్టోబరు 1, (way2newstv.com)

దేశీ స్టాక్ మార్కెట్ వరుసగా పడిపోతూనే వస్తోంది. ఈ వారం మార్కెట్ రెండో రోజూ నష్టాల్లోనే క్లోజయ్యింది. నెల ఆరంభం‌లో భారీగా పతనమైంది. వాహన అమ్మకాలు పడిపోవడం, మొండి బకాయిల భయాలు, బలహీనమైన స్థూల దేశీ గణాంకాలు మార్కెట్ సెంటిమెంట్‌ను దెబ్బతీశాయి. దీంతో సూచీలు మంగళవారం కుప్పకూలాయి.ఇంట్రాడేలో సెన్సెక్స్ ఒకానొక సమయంలో 737 పాయింట్ల మేర పడిపోయింది. 37,930 పాయింట్లకు పతనమైంది. నిఫ్టీ కూడా 227 పాయింట్ల నష్టంతో 11,248 పాయింట్లకు కుప్పకూలింది. అయితే చివర్లో సూచీలు కొంత కోలుకవడంతో నష్టాలు కొంత మేర తగ్గాయి. చివరకు సెన్సెక్స్ 362 పాయింట్ల నష్టంతో 38,305 పాయింట్ల వద్ద క్లోజయ్యింది. నిఫ్టీ 109 పాయింట్ల నష్టంతో 11,366 పాయింట్ల వద్ద ముగిసింది.

బ్యాంకుల  ఎఫెక్ట్,,,

✺ నిఫ్టీ 50లో బీపీసీఎల్, ఎంఅండ్ఎం, హెచ్‌డీఎఫ్‌సీ బ్యాంక్, ఐఓసీ, మారుతీ సుజుకీ షేర్లు లాభాల్లో ముగిశాయి. బీపీసీఎల్ దాదాపు 5 శాతం పెరిగింది.

✺ అదేసమయంలో యస్ బ్యాంక్ , జీ ఎంటర్‌టైన్‌మెంట్, ఇండస్‌ ఇండ్ బ్యాంక్,  షేర్లు కుప్పకూలాయి. యస్ బ్యాంక్ 22 శాతం కుప్పకూలింది. ఈ షేరు ఇంట్రాడేలో 30 శాతం పడిపోయింది. ప్రమోటర్ రాణా కపూర్ బ్యాంకులో 2.16 శాతం వాటా విక్రయించడం ఇందుకు కారణం. ఆర్‌బీఎల్ షేరు కూడా 22 శాతం నష్టపోయింది. ఎస్‌బీఐ 5 శాతానికి పైగా పతనమైంది. బ్యాంకింగ్ రంగంలో మొండి బకాయిలు పెరగొచ్చనే అంచనాలతో ఇన్వెస్టర్లు భయపడ్డారు. పీఎంసీ, లక్ష్మీ విలాస్ బ్యాంక్ ఎదుర్కొంటున్న తాజా పరిస్థితుల వల్ల ఇన్వెస్టర్లు ఇతర బ్యాంకులపై ఆందోళనతో ఉన్నారు.

✺ నిఫ్టీ‌ సెక్టోరల్ ఇండెక్స్‌లన్నీ నష్టాల్లోనే క్లోజయ్యాయి. నిఫ్టీ పీఎస్‌యూ బ్యాంక్ ఇండెక్స్ ఏకంగా దాదాపు 4 శాతం పతనమైంది. నిఫ్టీ మీడియా 4 శాతానికి పైగా కుప్పకూలింది. నిఫ్టీ రియల్టీ పరిస్థితి కూడా ఇంతే. ఫార్మా, మెటల్, ఐటీ ఇండెక్స్‌లు 1 శాతానికి పైగా నష్టపోయాయి.

✺ అంతర్జాతీయ మార్కెట్‌లో క్రూడాయిల్ (ముడి చమురు) ధరలు పెరిగాయి. బ్రెంట్ క్రూడ్ ధర బ్యారెల్‌కు 1.05 శాతం పెరుగుదలతో 59.88 డాలర్లకు చేరింది. డబ్ల్యూటీఐ క్రూడ్ ధర బ్యారెల్‌కు 0.57 శాతం పెరుగుదలతో 54.66 డాలర్లకు ఎగసింది.

✺ అమెరికా డాలర్‌తో పోలిస్తే ఇండియన్ రూపాయి నష్టాల్లో ట్రేడవుతోంది. దాదాపు 20 పైసలు పడిపోయింది. 71.07 వద్ద కదలాడుతోంది.